وصلین منی شاد ائتمه میش،هجرین منی زار ایله دی
مرغ دلــم عزم قفــــــس بر جای گلــــــزار ایله دی

عشقینده بس غصه یئدیم رنگ یوزوم چون زعفران
غـم بولمزیدیم که ندی یار عشقی غمخوار ایله دی

او زولفوون هر تاری نین واردی هزاران کشته سی
بیچاره کونـلوم نیله سین عشـــقین گرفتار ایله دی

گاهــــی عنایتـــــله منه بیـــــر گوشه چشـــمی نظـر
ائـــتدی منـــی نالایقـــی عشـــقه خریدار ایله دی

من مستـــیدیم روز ازل ، لعل لبونـــدن بیـــــر ایچــیم
وئردی منی مخموری باز ،بیـدار و هشـیار ایله دی

خال لبین هر کیم گوروب دیندن چیخیب، ترسا قیزی
تســـبیحیمی الـــدن آلیــب بوینــــوندا زنار ایله دی

آچدی باشیـندان زولفونو ، توکدی یوزه طره سینی
ائتدی پریشان طره نی، زولفون چو شه مار ایله دی

رسـوای عالم اولموشام بس که اورک وئـردیم اونا
عشـــقه سالیبـدیر بو باشی ، مشــهور بازار ایله دی

گون تک بولــوت دالـداسینا ، گیزلمــدن یاریم منیـم
بو عاشـــق زاری یئنـــه مشـــتاق دیـــدار ایله دی

فتان گوزون گوردوکجه من،عشق آرتیریر کونلومده،گل
فتان گوزون مست ایلیــوب عشــقینده بیمار ایله دی

بیـــمارین اولدوم من سـنین، گل بیـر عیادت ائت منی
باخ گور سنین عشــقین نئجه ،مندن پرستار ایله دی

عشقین منی عرشه یتوب ، منصور تک حق سویله دیم
بیــگانه لر محــکوم ائدیــب ، برچــوبه دار ایــله دی

سرباز عشــقیدیم گوزل ، باش وئرمیشــم من بو یولا
عشــق آرتیریبدی قدریمی ، آخرده سردار ایله دی

گئچـــدی بهار عشــقیمیز، اولدی خزان یپــراقی دل
سالـــدی ایاقی آلتیـــنا، بو کونلــومی خــوار ایله دی

عشق آتشینده بس یانیب کونلوم اولوبدور سوزناک
عشــــقین ائوین ویران قویان ، آه شـــرربار ایله دی

باری نیــه بس ائتــمه دی بیــر ذره منلــه اعتنــا
عاشـق نه قدر صبر ایله دی ، معشـوقه آزار ایله دی

هر قدر من مهــر ایله دیم ، او کونلومی قان ایله دی
بیگانیــه ساتــدی منی، بیلنســی بیـــــزار ایله دی

تقصیری یوخدی کونلومون،عشق آزدیریبـدی بو یولا
عشـــق عاشــقه هر نیله دی ، از عشق دلدار ایله دی

محرم یوخیدی سریمه ، تکجه سنه آچــدیم سوزی
کونلوم سنی لایق گوروب ، محرم به اسرار ایله دی

خوش یازمیسان ای«انتظار»،بوسوزلری سن عشـــقله
بو قدرتـــی احســـان سنه ، اللــه دادار ایلــــه دی

سرایش مطلع: 90.02.25 آرامگاه شیخ صفی - اردبیل
اتمام سرایش: 90.02.27 آرامگاه اوحدی مراغه ای – مراغه
محمدعلی مهدی پور پایدار